| 294 | L’ALCORAN. |
que par la permiſſion de ton Seigneur, il eſt maiſtre de nos actions au Ciel & en la Terre, & de tout ce qui eſt entr’eux, il ne t’a pas oublié[1], adore le & perſevere en ton adoration, cognois-tu quelque perſonne qui ſe nomme comme luy ? l’homme dit, Quoy, je mourray & je reſſuſciteray ? Il ne conſidere pas que Dieu l’a creé de rien, j’aſſembleray un jour les infidelles & les Diables, je les feray preſenter à la porte de l’Enfer ſur leurs genoux, & jetteray ſur eux toute ſorte de malheur parce qu’ils ont augmenté leur impieté envers leur Seigneur. Je cognois ceux qui meritent d’eſtre bruſlez dedans l’Enfer, ils y ſeront precipitez, c’eſt un arreſt tres-juſtement rendu par le Seigneur ; Je ſauveray les gens de bien, & deffendray aux infidelles de ſe mettre à genoux devant les Idoles, lors que les infidelles & pluſieurs des fidelles ont oüy preſcher mes commandemens, ils ont dit entr’eux qu’ils eſtoient dans un meilleur chemin que leur prochain, combien en avons nous exterminé auparavant eux aux ſiecles paſſez plus riches qu’eux & hipocrites comme eux ? Dis leur, Dieu prolonge la vie aux devoyez afin qu’ils cognoiſſent leurs erreurs, & qu’ils apprennent la cognoiſſance des peines qui leur ſont preparées, ils cognoiſtront ceux qui ſeront les plus malheureux, & ceux qui auront eſté les plus foibles en leur foy, & moins affectionnez au ſervice de ſa divine Majeſté. Dieu augmentera la foy de ceux qui ſuivront le droict chemin, & ceux qui luy ſeront obeïſſans joüiront de ſa
- ↑ Gelaldin dit que Mahomet fit plainte à l’Ange Gabriel d’avoir demeuré trop longtemps ſans le viſiter.
