| DE MAHOMET. | 275 |
vant nos Prophetes pour enſeigner au Peuple noſtre loy, tu n’y trouveras rien à changer, fais ta priere lorſque le ſoleil ſe couchera, au commencement & à la fin de la nuit, & à l’aube du jour, les Anges ſeront teſmoins de tes oraiſons, paſſe une partie de la nuit en priere, ce ſera un accroiſſement de merite, ton ſeigneur t’eſtablira au lieu de ſa gloire : dis, ſeigneur en quel lieu que j’aille faits-moy entrer & ſortir avec la verité : donne moy ta protection : dis que la verité eſt venuë, & que la vanité eſt diſparuë[1], ce livre guerira le Peuple de ſon erreur, il le mettra au chemin de miſericorde, & accroiſtra le malheur des infidelles. Nous avons exhorté les hommes à quiter leur impieté, ils ne l’ont pas faict, & ſe ſont: deſeſperez lors qu’ils ont eſté touchez d’affliction, dis leur, chacun de nous fait à ſa volonté, & Dieu connoiſt; celuy qui ſuit le droict chemin, ils t’interrogeront de l’ame dis leur, l’ame eſt un effet de Dieu, il vous en a donné fort peu de connoiſſance, aſſeurement s’il vouloit il vous oſteroit la ſcience qu’il vous a donnée, vous ne trouverez rien qui vous puiſſe proteger que ſa miſericorde; dis leur, ſi les Demons & les hommes eſtoient tous aſſemblez contre moy, ils ne pourroient pas compoſer un livre ſemblable à l’Alcoran. Nous avons enſeigné en l’Alcoran tout ce qui eſt neceſſaire pour le ſalut des hommes, neantmoins la plus grande partie du Peuple s’éloigne de la verité, & dit, Nous ne te croirons pas que tu ne nous faſſe ſortir des fontaines de deſſouz
- ↑ Voy Gelaldin.
