| 160 | L’ALCORAN. |
conduire les vray-croyans au droict chemin ; Dieu. envoye la pluye du Ciel, pour rafraichir la terre, c’eſt un ſigne evident de ſa toute-Puiſſance à ceux qui eſcoutent ſa parole, vous avez encore une marque de ſa toute-Puiſſance aux animaux qui vous donnent du lait pour vous nourrir, & une autre marque aux fruicts de la terre, au fruict des palmiers & de la vigne dont vous tirez du vin, & en recevez du profit ; Ces choſes ſont ſignes de ſa toute-Puiſſance à ceux qui les comprennent. Le ſeigneur a inſpiré à la Mouche a miel d’habiter dans les campagnes de ſe loger dans les arbres, dans les ruches, & de manger de toute ſorte de fruicts, elle produit le miel de diverſe couleur qui ſert de remede aux maladies des hommes, ces choſes ſont ſignes de la toute-Puiſſance de Dieu à ceux qui les confiderent : Dieu vous a creé & vous fera mourir, il y a des perſonnes entre vous qui ſeront pleines d’ignominie en leur vie, afin qu’ils cognoiſſent que Dieu ſçait tout & qu’il eſt tout-Puiſſant, il donne des biens aux uns plus qu’aux autres, les valets n’ont point de part aux facultez de leur maiſtre, & ne leur ſont pas aſſociez, (neantmoins ils aſſocient à, Dieu un autre Dieu esgal à luy, & blaſpheme contre ſa grace.) Dieu vous a creé hommes & femmes & vous a donné des enfans, & des enfans à vos enfans, il vous a enrichy des biens de la terre ; apres cette grace croirez-vous en vos Idoles qui ſont des choſes inanimées, vaines & inutiles ? ſerez vous
