| DE MAHOMET. | 157 |
armées de Pharaon; Les enfans d’Iſraël apres, avoir paſſé la mer, ont rencontré des perſonnes qui adoroient des Idoles, ils ont dit, ô Moyſe, faits nous des Dieux ſemblables aux Dieux de ce peuple, il a reſpondu, vous eſtes des ignorans, ces gens ſont gens perdus, ce qu’ils font n’eſt qu’ignorance & vanité, deſiré-je que vous adoriez autre Dieu que Dieu qui vous a preferé à tout le monde ? nous vous avons delivré des gens Pharaon qui vous faiſoient ſouffrir des grands tourmens, ils aſſaſſinoient vos enfans, ils mal-traittoient vos femmes, & ſouffriez de grands tourmens pour punition de vos pechez. Nous avons arreſté Moyſe ſur la montagne trente nuits & dix autres nuits, qui eſt quarante nuits, quand il y eſt allé, il a dit à ſon frere Aaron, ſois mon Lieutenant, commande à ce peuple en mon abſence, & ne ſuis pas le ſentier des meſchants. Lors que Moyſe eſt arrivé ſur la montagne au temps ordonné, & que ſon Seigneur luy a parlé, il a dit, Seigneur permets moy de te voir, il a dit, tu ne me verras pas, regarde contre cette montagne, ſi elle demeure ferme en cette place, tu me pourras voir, lors que le Seigneur parut ſur la montagne avec ſa lumiere, elle a eſté reduite en cendre, & Moyſe confus eſt tombé en terre comme mort ; apres qu’il a eſté relevé, il a dit, loüé ſoit le nom de Dieu, je luy veux obeyr, & croy que perſonne vivante ne peut le voir : I(l) a dit à Moyſe, je t’ay esleu & preferé à tout le monde, je t’ay fait Prophete, tu as parlé à moy, re-
