Page:L’Alcoran (traduction de Du Ryer).djvu/14

Cette page a été validée par deux contributeurs.
6 L’ALCORAN.  

dans le Paradis & mange ce qui t’agrera, mais n’approche pas de cet arbre, affin que tu ne ſois pas au nombre des injuſtes, le Diable les fit pecher, & ſortir de la grace en laquelle ils eſtoient, alors nous leur avons dit, deſcendez ennemis les uns des autres, vous aurez en terre une demeure, & des biens pour vivre quelque temps. Adam demanda pardon de ſa faute à ſon Seigneur, il luy pardonna parce qu’il eſt clement & miſericordieux, & dict deſcendez, ſortez tous du Paradis, il vous viendra cy aprés un guide de ma part, ceux qui le ſuivront ſeront delivrez de peur & d’affliction, (au jour du Jugement) ceux qui ſeront impies, & ceux qui celeront mes commandemens, bruſleront eternellement dedans le feu de l’Enfer. O enfans d’Iſraël, ſouvenez vous de la grace que je vous ay faicte, je ſatisferay à mes promeſſes ſatisfaictes aux voſtres, craignez moy, & croyez[1] en ce que je vous ay envoyé du Ciel, confirmant ce qui a eſté cy devant enſeigné ; ne ſoyez pas les premiers impies, & n’abandonnez pas ma loy pour aucuns prix, craignez moy, ne reveſtez pas la verité du mensonge, & ne la cachez pas volontairement, faictes vos prieres au temps ordonné, payez les decimes, & adorez voſtre Seigneur avec ceux qui l’adorent, commanderez vous au peuple de bien faire n’ayans pas ſoing de vos ames ? mediterez vous l’eſcriture ſans l’obſerver ? demandez ſecours avec patience & avec prieres, elles n’abondent qu’en ceux qui ſont obeïſſans, qui croyent,

  1. C’eſt l’Alcoran le nouveau & l’ancien Teſtament.