Orig. – Arch. des Affaires étrangères. Corresp. politique, Mss. France, no 19, fol. 32 recto.
Monsr de St Genyes, J’ay receu voz lettres et vous puis asseurer d’avoir tres agreable la diligence et bon debvoir dont vous usés et le sieur de Longa[1] en la ville de Bergerac, et que je ne trouve pas nouveau, estant si gens de bien comme vous estes, et de si longue main des plus affectionnez serviteurs de ma maison, particulierement de moy qui ne seray jamais ingrat de vous en savoir le gré que vos valeurs le meritent. Et quant aux articles que m’avés envoyez pour les choses dont vous desireriés estre fourni, il n’y en a, pour ceste heure, à quoy je sceusse pourveoir, pour des raisons que vous pourrés bien considerer ; mais des prochains jours je vous promets qu’il s’y fera tout le possible, et en pouvés estre certain, fors qu’à celuy où vous pretendés lever cinquante pipes de bled, necessaires pour les vivres ou payement des manœuvres. Je vous envoye à ceste fin une permission, de laquelle vous userés ainsi que vous verrés estre bon. Et pour le regard du capitaine la Palangue que j’eusse bien desiré vous demeurer, je n’y veulx pas pourveoir que ce ne soit au contentement de monsr de Turenne, auquel je l’ay par cy devant promis et accordé ; car vous sçavés quelle amityé je luy porte et combien je desire le contenter. Et quant à ce que vous me mandiés pour la desfense de tous gens de guerre de ne molester les paysans et laboureurs, et de ne leur prendre leurs biens et bestail sur peine de la vie, je veulx et entends que cela soit tres estroictement observé, ainsy que je le feray semblablement entendre au sieur de Turenne. Mais à ce que demandés comment vous debvés user des fruicts des biens de ceulx du party contraire, et s’ils peuvent estre pris ou non : ceulx qui resideront és
- ↑ Michel de Lur, vicomte de Roussille, seigneur de Longa, etc. fils de Bertrand de Lur et de Jeanne de Cardaillac, était gentilhomme ordinaire de la chambre du Roi et chambellan du roi de Navarre.
