Copie de la Vie de la Damoiſelle de Gournay,
enuoyée à Hinhenctum Anglois.
A Damoiſelle de Gournay Marie de Iars
naſquit à Paris, de Guillaume de Iars &
Ieanne de Hacqueuille, aiſnée de tous leurs
enfãs. Son pere tiroit le nom & l’origine noble
du Bourg de Iars vers Sancerre : Mais la
branche de cette race dont il procedoit venant
par ſucceſſion de temps à s’affoiblir de biens, ſes derniers
ayeulx furent forcez de quitter la campagne & l’eſpée,
pour ſe retirer aux Villes & aux Eſtacs & vaccations
qui s’y practiquent : & fuſt quand à luy Threſorier de la
maiſon du Roy, outre la Capitainerie & Gouvernement de
certains Chaſteaux de Remy, Gournay & Moyenneville
iadis édifiez par les Anglois. Il auoit eu des charges beaucoup
plus belles mais d’autant que c’eſtoit par commiſſion
ſeulement, nous ne nous amuſerons point à les notter. La
maiſon de la mere eſtoit noble auſſi, mais plus foriſſante :
toutes deux apparentes & alliées de pluſieurs bonnes &
honorables familles en France & toutes deux Catholiques :
Le pere perſonnage d’honneur & d’entendement laiſſa ſa
maiſon riche, tant par les biens que la femme bonne &
vertueuſe d’ailleurs, luy auoit apportés, que par ſes labeurs :
mais les guerres arriuées depuis ſon deceds & autres accidents,
eſſimerent bien fort les commoditez de la veuſue &
des enfans, qui reſtoient ſix. Le pere mourant ieune, laiſſa
cette fille petite orpheline, mais ſa mere luy dura iuſques
à pres de vingt cinq ans : ſoubs laquelle, a des heures pour la
pluſpart deſrobées, elle aprit les Lettres ſeule, & meſme le
Latin ſans Grammaire & ſans ayde, confrontant les Liures
de cette Langue Traduicts en François, contre leurs
originaux. Et fit ſon eſtude ainſi, tant par l’auerſion que