Tuz lur escuz i fruissent e esquassent,
3880Lur osbercs rumpent e lur cengles depecent ;
Les alves turnent, les seles cheent à tere.
.C. milie hume i plurent ki ’s esguardent. Aoi.
A tere sunt ambdui li chevaler :
Isnelement se drecent sur lur piez.
3885Pinabels est forz, isnels e legers.
Li uns requiert l’altre, (n’ unt mie des destrers,)
De cez espées enheldées d’or mer
Fièrent e caplent sur cez helmes d’acer,
Grant sunt li colp as helmes detrencher.
3890Mult se dementent cil franceis chevaler.
« E Deus ! dist Carles, le dreit en esclargiez ! » Aoi.
Dist Pinabels : « Tierri, kar te recreiz :
« Tis hom serai par amur e par feid,
« A tun plaisir te durrai mun aveir ;
3895« Mais Guenelun fai acorder à l’ Rei. »
Respunt Tierris : « Ja n’en tendrai cunseill.
« Tut seie fels, se jo mie l’otrei !
« Deus facet hoi entre nus dous le dreit ! » Aoi.
Ço dist Tierris : « Pinabel, mult es bers,
3900« Granz es e forz e tis cors ben mollez,
« De vasselage te conuissent ti per :
