Et les bons mis en oubli ;
J’ai aultre pensée.
Cils l’aura, dont sui amée
Et souverainne clamée,
Bien l’a desservi,
Or se conforte par mi,
Et de riens il ne s’effrée
Se par honnour etc.
Ensi estoient en solas
Et chantoient, dont hault, puis bas,
Si com les chançons l’aportoient.
Mès quoi qu’ensi se deportoient
Les damoiselles au chanter,
Je m’ose bien et puis vanter
Les trois compagnons dessus dit,
Refus, Dangier et Escondit
N’avoient cure de la feste ;
Ançois crolloit cascuns la teste.
Riens ne voient qui lor souffise.
Pour quoi sont tel gent en offisce ?
Il estoient là en la place.
Riens ne voi en euls qui me place ;
Car il avoient, li larron !
Trois testes en un chaperon ;
Ne je ne passe pié avant
Qu’il ne me soient droit devant
Le regard, et en mi la chiere
Sus moi on sus ma dame chière.
