Le texte de cette page a été corrigé et est conforme au fac-similé.
CI APRÈS
SENSIEUT UN TRETTIE AMOUREUS
qui s’appelle
LE JOLI BUISSON DE JONECE.
Des aventures me souvient
Dou temps passé. Or me convient,
Entroes que j’ai sens et memoire,
Encre et papier et escriptoire,
Canivet et penne taillie,
Et volenté appareillie
Qui m’amonneste et me remort,
Que je remonstre avant ma mort
Comment ou Buisson de Jonece
Fui jadis, et par quel adrece.
Et puisque pensée m’i tire,
Entroes que je l’ai toute entire
Sans estre blechié ne quassé,
Ce n’est pas bon que je le passe.
Car s’en noncaloir me mettoie
Et d’autre soing m’entremettoie,
Je ne poroie revenir
De legier à mon souvenir.
