Page:Froissart - Poésies (1829).djvu/275

Le texte de cette page a été corrigé et est conforme au fac-similé.
259
DE JEAN FROISSART.

Ma dame me fait trop pensieu,
Et pas ne li di en Ébrieu
Ma maladie,

Mais en langage cler et plain
Quand je puis ; mès tant fort je l’aim
Que quand li voeil dire en certain
Et en apert
Comment pour li sui soir et main,
Je n’ai bouche, coer, oeil ne main,
Qui puist dire ne monstrer grain
Quel chose il quert.
Or ne sçai de quoi ce fait sert,
Car simplement et en couvert
Se tiennent mes yex tout ouvert,
Et ont grant fain
Que mon coer dice : « j’ai souffert
» Tous griefs pour vous, dame or ; dessert
» Mort ou merci ; il le requert
» Au pardarrain. »

Mès nennil mon coer pas ne poet
Dire tout ce qu’il pense et voet,
Et pour ce souffrir l’en estoet
Tamaint grant grief
Car Desirs ardamment le moet,
Par Plaisance qui le promoet.
Et puis q’un tel assaut s’esmoet
Dedens mon chief
Il convient que je traie à chief
Ma penitance et mon meschief.