nsi sus ce pourpos se sont
Arresté, et ceste nuit ont
Passé jusques au matinet.
Messires Daghors si se met
En arroy que pour chevaucier
Et se part pour luy avancier,
Ce dist, puis qu’il le couvient faire.
Saigremor, qui voloit parfaire
Ossi ce qu’il avait empris,
A son oisiel sus le poing pris,
Et dist qu’il voelt aler voler
Et tost arriere retourner.
Et pour ce qu’il avoit d’usage
D’aler souvent en tel voiage,
Sur ce on ne mespense rien,
Mais li ordonnent a grant bien.
Saigremors part moult bien montés,
De .ii. escuiers acostés.
As camps s’en vient, Duvelin lait
Et par devers les bois se trait,
Ou messires Dagors l’attent.
Li damoisiaus qui a bien tent,
Quant il deubt le bois approcier, f. 182 b
Lait lors aler son esprivier.
Cilz vole ou bois tout contremont
Et adont Saigremors semont
Ses escuiers que apriès voisent,
Et cilz, qui mies ne s’aquoisent
Mais voelent a lui obeïr,
Se vont lors ens au bois ferir
En huiant apriès l’esprivier.
Et quant cilz les voit eslongier,
Si se part et prent une voie,
Qui tout droit a Dagor l’envoie,
Car il en estoit en agait.
Page:Froissart - Méliador, tome 3.djvu/91
Le texte de cette page a été corrigé et est conforme au fac-similé.
86
Méliador
