Page:Froissart - Méliador, tome 3.djvu/254

Le texte de cette page a été corrigé et est conforme au fac-similé.
249
Méliador

Agamanor devers les dames,
30325 A qui Diex gart et corps et ames,
En l’eure sans plus sejourner.
Avant ce c’on alast disner,
On les espousa, ce m’est vis,
A tel jour et a tel devis
30330 C’on avoit Hermondine fait,
Et la, en solas et en hait,
Furent danses recommencies
Et puis caroles resjoÿes, f. 222 d
Ou on chanta moult et assés.
30335 Je ne sui mies si lassés
C’un plaisant rondelet ne die,
C’une damoiselle jolie
Canta la com bien enfourmée.
Elle estoit Sebille nommé[e].
30340 C’est ceste pour qui Saigremor
Travillera le monde encor ;
En tel voie l’a il empris,
Combien qu’il soit des fées pris.
Li rondelès a sa matere
30345 Servoit, c’est cose toute clere ;
A tout le mains ensi l’entens,
Selonch ce c’avoir puis de sens.


Rondel.

Lespoir de vous bien tost revoir [1]
A joie et a grant lïece,
30350 Douls amis, me fait resjoïr.

Ce puis je bien dire, pour voir :
Ce me met hors de tristrece
L’espoir, etc.

  1. 30348 revoir, B reveir.