« Je vous serai bons campions. »
« Ensi la nous departions.
« Onques ne le vi puissedi ;
« Mais n’a pas .ii. mois qu’il cheï
« Que j’estoie chiés .i. manoir
« Logiés pour la nuit remanoir,
« Par d’encoste moy mon varlet.
« Cilz chevaliers vint la de fet,
« Sans ce que de nous presist garde ;
« Et me samble quant g’i regarde,
« Que de nuit, com par escripture,
« Il nous compta quele aventure
« Le menoit parmi la contrée.
« Quant ce vint a la matinée,
« Il se parti le bon matin ; f. 159 b
« Devant nous se mist au chemin
« Et jou apriès environ prime.
« Chiere dame, je vous exprime
« L’ordenance ensi qu’elle va,
« Selonch les parolles que la
« Nous conta li dis chevaliers.
« Je chevaucai .ii. jours entiers
« Et estoie si fors pensieus,
« Que mes varlès qui n’est pas viulz
« En estoit durement irés,
« Et tant fu de lui detirés
« Que je li contai mon pourpos.
« De puis euc .i. peu de repos,
« Car nous nous mesimes a voie
« Pour venir, se Diex me doinst joie,
« En ce propre lieu ou je sui.
« Mais saciés que pas je ne fui
« Si trestos avisé adont,
« Le premier jour ne le secont,
« Comment je poroie venir
« Ceens, ne a vous avenir
Page:Froissart - Méliador, tome 2.djvu/364
Le texte de cette page a été corrigé et est conforme au fac-similé.
360
Méliador
