« Fait ceste cose non pareille f. 155 d[1]
« A nulle autre dont parler doie.
« S’il est ensi, il a pris voie
« Moult soubtieue pour vous veoir ;
« Et que, pour vous faire a savoir
« Comment li est de vostre amour,
« Je suppose ensi c’a nul jour
« Nulz povres homs de bas afaire
« N’euist osé tel cose faire.
« Toutes fois encor le verons
« Et si bien examinerons
« Que nous en serons a segur.
« Se je le trueve ossi meür
« C’on doit trouver .i. chevalier,
« Qui ensi se voet avancier
« Comme il le moustre maintenant,
« Ma cousine, je vous creant
« Qu’il ne fait pas a refuser
« Et foy y vodrai adjouster.
« Je vous dirai qu’il faurra faire,
« Pour la besongne en bien parfaire.
« Je l’irai querre, ou nom de vous,
« Et puis li dirés par mos doulz,
« Present moy, sans estre seulete,
« Que vous estes encor jonete
« De savoir, d’avis et d’eage
« Pour entrer en pelerinage
« D’Amours, sans avoir .i. moiien.
« De tout ce vous crera il bien
« Et vous me lairés dou sourplus
« Couvenir, ains qu’il traie ensus.
« Je sarai sen entention [2]
« Par bonne imagination. »
Page:Froissart - Méliador, tome 2.djvu/350
Le texte de cette page a été corrigé et est conforme au fac-similé.
346
Méliador
