Respont par trop bon couvenant :
« Certes, mestres, pas n’estes fols.
« Bien voet mon coer estre si mols
« Que il vous ora volentiers,
« Afin que li dis chevaliers f. 155 a
« Nous soit .i. petit esclarcis,
« Et si en dirai grans mercis
« Envers vous et a desservir. »
Adonques s’ala pourveïr
Agamanor de biel parler
Et ala tout enventurer.
A .i. genoul la s’engenelle,
Et dist : « Dame, j’ay grant merveille
« Comment tant me sui astenus,
« Quant si avant je sui venus
« Et si ne me suis descouvers,
« Ne a vous encores ouvers.
« Saciés, ma douce dame chiere,
« Que vous veés devant vo chiere
« Le chevalier qui ot le pris
« Dou tournoy ; et si me renc pris
« A vous, comme vostre prison.
« Vous me tenés en vo prison ;
« Si poés de moy vo bon faire,
« Mais je vous sens si deboinaire,
« Si courtoise, et si gratïeuse
« Et si grandement amoureuse,
« Que vous arés pité de moy.
« Et je vous jur, en bonne foy,
« Et de ce vous ferai certainne,
« Que traveil, ne peril ne painne
« Que endurer pora mes corps
« En toutes places, ens ou hors,
« Nulles n’en vodray ressongnier,
« Mais que pour vostre chevalier,
« Ma dame, vous me retenés.
Page:Froissart - Méliador, tome 2.djvu/347
Le texte de cette page a été corrigé et est conforme au fac-similé.
343
Méliador