« Ensi com cilz qui sui sentans
« Pour s’amour mainte cose amere,
« Je li euisse ma matere
« Dit et moustré tout quoiement
« Par douce parole, et comment
« J’avoie erret et travilliet,
« Et nuit et jour a ce villiet ; f. 153 a
« Que laiens ne savoie entrer
« Pour mes besongnes remoustrer.
« Fors par l’estat que fait avoie
« Et que voirement je savoie
« Bien ouvrer ensi de jonece,
« Et pour plus la secrée adrece
« J’avoie cel avis eü.
« Tantost j’euisse en li veü
« S’a moy a nulle affection,
« Quant ensi men entention
« Li euisse moustré et dit.
« Or m’a on dou tout contredit,
« Car laiens je ne sui nommés
« Fors uns pointres bien renommés.
« Ce me desplaist trop fort, par m’ame !
« Quant entrés y sui a tel blasme,
« C’est bon que plus ci ne sejourne,
« Mais vers Bertoulet m’en retourne
« Si reprende nouvel conseil. »
Agamanor en ce frefeil
Compte a son hoste et si le paie,
Et dist ensi : « C’est cose vraie.
« Au matin je me partirai,
« Biaus hostes, et si m’en irai.
« Je me lo moult de vostre hostel. »
Mais Agamanor fera el,
Car quant il fu le soir couciés,
Il s’est grandement empeciés
A penser apriès Phenonée,
Page:Froissart - Méliador, tome 2.djvu/339
Le texte de cette page a été corrigé et est conforme au fac-similé.
335
Méliador
