Qui veoit bien qu’en mautalent
Estoit cilz que mestre elle nomme.
Au partir dist : « Ne sçay quel somme
« De florins vous raporterai,
« Mais pour voir je vous paierai ;
« J’en ay ja veü la maniere. »
Adont se part la camberiere
Et s’en vient ou sa dame estoit,
Qui devant sa dame arrestoit, [1]
Car elle lavoit pour disner.
A la fille ala demander :
« Quel cose as tu fait de ton homme ? »
— « Ma dame, » dist celle, « quel somme f. 151 a
« Volés vous que je li delivre ?
« Il muse aultre part qu’en .i. livre.
« Je ne sçai quel cose il li fault.
« Une heure puis bas, et dont haut,
« Tient la tieste comme uns buinars. »
— « Delivre li quarante mars,
« Et li di au departement
« Qu’il reviegne proçainnement
« Et qu’il m’aporte aucune cose,
« Et que vraiement je propose :
« Je parlerai a monsigneur
« Mon pere et a tres haute honneur
« Sera mis dedens brief termine. »
La camberiere rachemine
Et s’en vient au mestre d’ostel
Et dist : « Garoul, il ne faut el
« Fors que vous aportés viande,
« Car ma dame le vous commande. »
— Pour qui ? » Garoulz li respondi.
— « Pour .i. homme que j’ai o mi,
« Que ma dame voelt festoiier. »
— « Belle, or ne vous voelle anoiier.
« Alés et faites bonne chiere.
- ↑ 20455 dame, B table.
