Phenonée o ses damoiselles
Estoit entrée en .i. vregié
D’esglantiers et rosiers vergié ;
La faisoit bel et deduisant.
Agamanor, qui moult plaisant
Avoit le corps et la personne,
Pour parler sagement s’ordonne
A la belle quant vera l’eure,
La quele gaires ne demeure,
Car elle est dou vregiet issue
En une gonnielle tissue
De soies de plusieurs couleurs.
Agamanor, qui les doleurs
De bonne amour prent et encarge, f. 149 d
S’en vient, et noient ne s’atarge
Et par devant li s’agenelle
Et puis .i. petit appareille
Le role ou les pointures sont.
.I. peu le desploie et adont
Dist ensi : « Ma tres chiere dame,
« J’ai ordonné et fait par m’ame
« Ce biel ouvrage ou nom de vous. »
Phenonée, qui en genous
Voit l’ouvrier, si dist : « Levés sus
« Et ne vous traiiés point en sus,
« Car nous le volons regarder. »
Lors le prent a desvoleper
Agamanor par petis plois,
Et la belle l’atouce as dois,
Qui grandement prise l’ouvrage,
Et dist : « Haro ! en mon eage,
« Point n’ai veü cose si bonne.
« Ou fu ce fait ? » — « Dame, a Tarbonne. »
— « En Tarbonne ! » — « Voire, ma dame
« La l’ai jou ordené, par m’ame,
« Ma chiere dame, au nom de vous. »
Page:Froissart - Méliador, tome 2.djvu/326
Le texte de cette page a été corrigé et est conforme au fac-similé.
322
Méliador