Le tournoy bellement ordonne
Et tout ensi qu’il se porta
Et comment le pris enporta
Par tres bonne chevalerie,
Et comment il vint la nuitie
Veoir les dames ou chastiel.
Tout oevre si bien et si biel
Que c’est plaisance au regarder,
Et puis le va enrondeler
Moult bellement en .i. baston.
Au preudomme dist en bas ton :
« Biaus hostes, g’irai au manoir
« Veoir Phenonée et savoir
« S’acater vodroit mon ouvrage. f. 149 c
« Au retour arés bon buvrage,
« Car j’aporterai des deniers. »
Et li hostes dist : « Biaus ouvriers,
« Alés par tout ou il vous plest,
« Car moy et mes hostelz si est [1]
« Dou tout a la vostre ordenance. »
Adont Agamanor s’avance,
Qui en l’ostel plus ne demeure,
Et se part de Tarbonne en l’eure,
Car pas n’estoit lonch de le porte ;
Son ouvrage avoech li emporte.
Tant a alé qu’il est venus
La ou li hostelz fu tenus
De Phenonée, ens ou biau bois,
Ou jeuer aloit a le fois
O Luciienne, sa cousine.
Encores a la bonne estrine
Y estoit elle, quant la vint
Agamanor, qui quois se tint
Tant qu’il en ot oÿ nouvelles.
- ↑ 20261 et mes hostelz, B et vos hostelz.