Oultre est Agamanor passés,
Mais ses harnois droit la demeure
Et Bertoulès, qui a toute heure,
Le vodroit a point consillier.
La dame le peut recueillier
Moult liement et doucement,
Et mist a son commandement
L’ordenance de son hostel.
Messire Agamanor fist el,
Car onques ou manoir n’entra :
Homme ne femme n’encontra
Qui recognoistre le peuissent,
Ne qui de son estat sceuissent.
Venus s’en est dedens Tarbonne f. 149 b
Et la moult sagement s’ordonne,
Et fait a .i. preudomme a croire
Qui li livre et mengier et boire,
Que c’est uns ouvriers trespassans
Et qu’il y a plus de .v. ans
Qu’il ne fu dedens son pays.
Li preudons li dist : « Biaus amis,
« Vous estes li tres bien venus. »
En cel estat s’est la tenus
Melyador couvertement
Et fait querir tout bellement [1]
Ce qu’il li fault, par le preudomme,
Couleurs et a oile et a gomme
Et ce c’au mestier apertient.
Agamanor droit la se tient,
Tant qu’il ot plainnement ouvré
En .i. drap non mies trop lé,
Mais environ de .v. quartiers,
Comment li rouges chevaliers
Tournïa par devers Tarbonne.
- ↑ 20233 querir, B cuerir.