« Tu me poes moustrer et reprendre,
« A ton voloir, si com tu voes,
« Car toutdis consillier me sues.
« Briefment g’irai vers Phenonée
« Sus une maniere ordenée,
« Que je te dirai maintenant.
« J’ai l’engien et le couvenant,
« Ensi que tu scés, de pourtraire.
« Se vodrai une cose faire
« De cel art, tel que je dirai :
« En une toile pourtrairai,
« De blanc et de noir assé[s] bien,
« L’ordenance et tout le maintien
« Dou tournoy, qui fu biaus et gens,
« Et ou moult ot de vaillans gens,
« Devant Tarbonne, sus la place, f. 148 d
« Et, tout ensi c’on se solace
« Et solaça ossi le nuit,
« L’esbatement et le deduit
« Que les dames ou chastiel fisent,
« Et des cançons que elles disent
« Dont j’ai bien retenu aucunes,
« Et ossi comment les fortunes
« Furent pour le chevalier rouge,
« Et que sans faire le harouge
« Il ala dedens le chastiel
« Et veï donner bien et biel
« Le pris dou faucon qui fu la ;
« Mais a nulle ame ne parla,
« Ançois retourna sagement.
« Encor ferai certainnement
« Comment il chevauce ens ou bois,
« Et ou poursieut pour une fois
« Le chevalier as armes blances.
« Ce seront bonnes ordenances
« Et qui donront moult a penser
Page:Froissart - Méliador, tome 2.djvu/322
Le texte de cette page a été corrigé et est conforme au fac-similé.
318
Méliador
