De ce le voel recommender
Plus que chevalier de son temps.
Quoi qu’il fust gratïeus et gens,
Fiers et hardis oultre mesure,
S’estoit il enclins par nature
Au pourtraire, et imaginer
Tout ce qu’on peuist deviser ;
Et ne li coustoit ce plus rien,
Tant avoit il en li de bien,
Que dont qu’il fesist une lettre,
La ou cas qu’il si vosist mettre.
Mais il l’avoit entrelaiiet
Puis le temps qu’il ot chevauciet
En la queste que vous savés,
Et se merveilles en avés
C’est uns argus tous pourveüs. f. 148 c
J’ai bien des chevaliers veüs,
Frans, gentilz, et vaillans, et preus
Et as armes moult corageus,
Qui estoient en tel ouvrage
Enclin de sens et de corage,
Et en grant chierté le tenoient,
Et vraiement bon droit avoient,
Car c’est une science noble,
Et en poet de Constantinoble
Le filz de l’empereur ouvrer,
Sans li ja noient reprouver.
gamanor, sus cel estat,
Mist son avis et son restat :
« Compains, » dist il a Bertoulet,
« Je t’ai dit et moustré de fet
« Plusieurs coses sus nostre avis
« Et de toutes il t’est avis
« Qu’elles ne facent point a prendre.
Page:Froissart - Méliador, tome 2.djvu/321
Le texte de cette page a été corrigé et est conforme au fac-similé.
317
Méliador
