Retient voirement l’aventure,
Com il l’euist en escripture,
Li recorde de point en point,
Sans ce que falli y ait point,
Tout ce que Lyones eut dit,
Entrues qu’il furent en leur lit.
Et cilz a la targe vermeille
Trop durement s’en esmerveille ;
A painnes le voet ne poet croire.
Toutes fois, par parolle voire,
Bertoulès si bien le recorde
Que finablement il l’acorde
Et dist que ce poet trop bien estre,
Car Amours font bien souvent nestre
Plus fortes coses que ne soient
Celles qu’en leur present il voient.
Adont s’arreste Agamanor
Et dist : « Or me recorde encor
Ceste cose, si com tu l’as f. 147 c
Recordé, et si n’en fault pas. [1]
Je preng a l’oïr grant plaisance,
Car je voel aucune ordenance
Mettre sus, quant oÿ l’arai ;
Vis m’est que mieulz le sentirai
A celle fois c’a la premiere.
Et Bertoulès, en tel maniere
Que recordé devant li ot,
Li dist ; onques n’en falli mot.
Tout retint bien li chevaliers.
« Or, » dist il, « ce m’est chi uns fiers
« Encontres et uns durs recors,
« Quant la damoiselle au gent corps,
« Pour qui enamourés je sui,
« Sueffre et endure tel anui,
« Et se m’est dure la matere,
- ↑ 19985 fault, B faul.