« Et n’a cheens, je vous creant,
« Que .ii. lis, les quels il ont pris. »
Ce dist Lyones : « Biaus amis,
« Or demandés au chevalier
« Se ci me laira herbegier. »
Et li forestiers li demande.
Agamanor a la demande
Respont : « Oïl, compains, par foy.
« Fai le cha venir dalés moy ;
« Il gira o mon escuier. »
Evous venu le forestier
A l’uis, qui dist : « Entrés, entrés ;
« Car c’est li plaisirs et li grés
« Dou chevalier qui ceens loge,
« C’avoech lui soiiés en sa loge. »
Adont Lyonniaus ens entra,
Qui son cheval bien ostela
Et .i. petit menga et but,
Et puis ala la ou cilz jut [1]
Qui estoit Bertoulès nommés,
Qui se voloit, c’est verités,
Relever et laissier le lit.
Mais messires Lyons a dit
Que non fera aucunement :
Puis qu’il l’a pris premierement,
C’est bien raisons qu’il y demeure.
Messires Lyones en l’eure
Se coucha, car ja estoit tart. f. 145 d
Bertoulès y fist bonne part
Dou dit lit, qui point n’estoit grans.
Trop ne dormi li mieulz dormant,
Car li linçuel estoient gros
Et li lis ossi si peu mos
Que sus gisoient en grant painne.
- ↑ 19737 ala la, B a la la.