Qui chevauce amont et aval
Le pays de Norchombrelande.
.I. soir, par aventure grande,
De Phenonée oÿ nouvelles.
Les raisons si en sont moult belles
A oïr comment ce avint,
Et pour quoi savoir li couvint.
l est voirs que li chevaliers
Et Bertoulès, ses escuiers,
Avoient chevauciet .i. jour.
Si prisent au soir leur sejour
Chiés .i. forestier en .i. bois.
Li forestiers fu moult courtois,
Car il les coucha en .ii. lis,
De quoi li uns fu moult petis.
Agamanor volt la jesir ;
Bertoulès li fist son plaisir,
Li forestiers n’en avoit plus.
Quant couchiet furent, d’yaus ensus
Se traist li forestiers par soy
Et dist : « Signeur, ce poise moy,
« Que je ne vous puis mieus aidier. »
Et cil disent sans atargier :
« Nous sommes bien, biaus doulz compains.
« Moult bonne est ta char et tes pains,
« Et la chiere que fais nous as,
« Ne tu ne le perderas pas ;
« Encores te sera rendu. » f. 145 c
A ces mos evous descendu
Monsigneur Lyonniel a l’uis
Qui dist : « Forestier, se la puis
« Que tu me herberges meshui ? »
— « Sire, » respont cilz, « voir je sui
« Cargiés d’un chevalier errant,
Page:Froissart - Méliador, tome 2.djvu/309
Le texte de cette page a été corrigé et est conforme au fac-similé.
305
Méliador
