Je ne desir nulle riens tant
Que de veoir ma douce dame.
A liece et a joie grant
Je ne desir, etc.
Pour ce pri Dieu que bien briefment
Ce puist estre, car, par m’ame,
Je ne desir, etc.
nsi s’esbat Melyador
Au canter. Il n’a pas encor
Veü le pas dou Brun Rocier,
Mais il le prent a approcier.
Il chevauce parmi bruieres,
Et traverse landes moult fieres
Et pays durement estragne,
Trop plus qu’il ne soit en Bretagne.
Celle nuit jut sus une lande
Ou il n’a pas ce qu’il demande,
Mais passe trestout liement.
Au matinet certainnement
S’est il armés et mis a point.
Ou cheval monte et si se joint
Sus ses estriers, par mignotise ; f. 140 d
Ensi chevauce il a sa guise.
Assés tost .i. hault mont monterent ;
Ou fons desous il encontrerent
.I. irois qui au bois aloit,
Qui s’enfuit sitos qu’il les voit.
Mais Lansonnès ala après.
