Page:Froissart - Méliador, tome 2.djvu/285

Le texte de cette page a été corrigé et est conforme au fac-similé.
281
Méliador

Dedens son escu est plantés ;
La lance apuigne qui fu roide,
18880 A la pointe acerée et froide.
Messire Housagres et Panfris [1]
Ont errant leurs .ii. lances pris,
Et se mettent en bon arroi.
Lors esporonnent tout li troi,
18885 Li uns sur les .ii., ce me samble.
Tantost se trouverent ensamble,
Car il viennent de grant randon.
Melyador en abandon
Se met, pour l’un d’yaus consieuir ;
18890 De plains eslais s’en peut venir
Sus monsigneur Panfris adont.
Je vous di bien que si cop font
Moult grandement a ressongnier.
Encores pour mieulz besongnier,
18895 Afin que li secons s’avise,
Melyador dont je devise
Le consieui de tel façon,
Droit ens ou mi leu dou blason,
Qu’il li fendi comme une osiere. f. 139 c
18900 Le fier li fist passer derriere
Le dos, bien une grant puignie.
Il l’empaint par chevalerie ;
Jus le reverse, il chiet la mors.
Melyador li trait dou corps
18905 La lance qui estoit sanglente.
Or en fait chiere moult dolente,
Et moult bien en a les materes
Housagres qui estoit ses freres.

  1. 18881 Housagres, B Honsagres.