Dont l’aventure tint a male,
Coi c’amender ne le peuist.
Moult bien vosist qu’il li euist
Cousté mille florins et plus,
Et il y fust a temps venus.
Sitost comme il se peut armer,
Il ne volt la plus sejourner
Ou on li ot fait bonne chiere.
La dame qui fu hiretiere
Dou Brun Manoir, ou jeü ot,
Remercia de quanqu’il pot,
Ensi que bien le sçavoit faire,
Et puis, pour mon compte parfaire,
Il monta et d’iluech parti
A l’entente et sur tel parti
Que pour aventures trouver.
Une heure li ala rouver
Ses varlès, qui trop bien chantoit,
Qu’il chantast, puis qu’en point estoit,
.I. virelay qu’il avoit fait ;
Et je vous dirai de quel fait.
ilz chevaliers avoit eü,
En dementrues qu’il ot jeü
Au Brun Manoir dit par arriere,
Dalés lui une camberiere
Qui moult estoit courtoise et sage. f. 133 b
La damoiselle avoit d’usage
De dire en son parler, pour vrai :
« Sans doubte ensi je le ferai. »
Briefment, en sa parolle toute,
Toutdis mettoit devant : « Sans doubte. »
Messires Tangis, qui oÿ
L’avoit souvent, s’en resjoÿ,
Entrues que sus son lit gisoit,
Page:Froissart - Méliador, tome 2.djvu/260
Le texte de cette page a été corrigé et est conforme au fac-similé.
256
Méliador
