nsi fu droit la une espasse
Cilz a qui on a fait grant grasce,
Quant il est alés si avant,
Et par sage et bon couvenant
Parolle a la belle Hermondine,
Qui si garnie est de doctrine
Et de grant sens, au dire voir,
Que dame n’en poet plus avoir ;
Car, a fin que cilz mieulz en vaille
Qui ses sers chevaliers se baille,
Elle li moustre doucement
Parolles de grant sentement,
Et li dist que c’est cilz, sans double,
En qui elle a s’entente toute
Mise plus que nul chevalier
Qui puisse errer ne travillier,
Pour les grans proeces de li.
En devisant furent ensi
Que tout droit sus le point dou jour,
Mais tant leur plaisoit le sejour
C’au jour ne prendoient point garde.
Argentine lors se regarde
Que li jours venoit durement ;
Si dist a sa dame erranment :
« Dame, li jours vient grans et biaus.
« Tous plains en sera cilz chastiaus
« Assés tost, il n’est mies doubte. f. 130 c
« Pour tant le vous di que je doubte
« Que cilz chevaliers qui est ci
« Ne soit veüs, je vous affi.
« J’en ay grant soing oultre l’ensegne.
« Ceens a de chiaus de Bretagne
« Qui le poroient recognoistre
« Et, en ce, son nom peu accroistre. »
Dist sa dame : « Vous dittes voir.
Page:Froissart - Méliador, tome 2.djvu/249
Le texte de cette page a été corrigé et est conforme au fac-similé.
245
Méliador
