Elle appella .i. escuier
Et dist : « Il te fault chevaucier
« En Escoce, vers ma cousine,
« Et li porteras cesti signe,
« Ceste lettre avoec .c. salus. »
Cilz respont : « Ma dame, au sourplus,
« Ferai vostre commandement. »
Adont se parti erranment
De Montgriès et s’est mis a voie
Viers Escoce. Diex le convoie ! f. 72 b
De li tant qu’en present lairons,
Et au chevalier revenrons
Que j’appelle Melyador.
Vous n’avés point de li encor
Oÿ nulle cancon nouvelle,
Depuis que de la damoiselle
De Montgriès ilz s’estoit partis.
Il chevauce plains et lairis
Ou pays de Norchombrelande.
Il a traversé une lande
Et s’adrece devers .i. bois.
Adont s’esmut a haute vois
De chanter .i. seul rondelet,
Et croi qu’il le fist tout a fet
Qu’il le canta, car il fu cours,
Mais uns grans sentemens d’amours
Estoit ou rondelet entés.
Ce sera bien li volentés
Dou chevalier de Cornuaille,
Que vous l’oiiés, vaille que vaille.
Toutes fois, il vault bien c’on l’oe
Et qu’en escoutant on le loe.
Page:Froissart - Méliador, tome 2.djvu/17
Le texte de cette page a été corrigé et est conforme au fac-similé.
13
Méliador
