N’i euist mis, pour nul avoir.
La ne vorrent plus remanoir,
Mais sont rentré en une voie,
Qui devers .i. bois les avoie ;
Et messires Corbiliers part
Qui s’en va ossi, aultre part,
Chiés soi ou en aultre maison
Pour penser de sa garison.
Et Agamanor, ce saciés,
Lors que de li fu eslongiés, f. 101 b
Desirs et sentemens li vinrent,
Qui en .i. tel pourpos le tinrent,
Dou quel onques ne se parti,
Si ot .i. virelai joli,
Fait et chanté par grant plaisance.
Je vous en dirai l’ordenance.
J’ai en mon coer si fort enté,
Dame, vostre tres grant biauté,
Qu’il m’en souvient, et jour et nuit,
Et a bon droit, car tout mon bien
Me vient de vous, sans faillir rien.
C’est ma plaisance et mon deduit,
C’est tout mon eur en verité.
Pour ce ne poet en moi venir
Anui, tristrece ne tourment,
Ne nulle riens de desplaisir,
Dont je voel vivre liement.
Si doit ce jour estre prisé,
Que premiers a vous me donné.
S’en lo Amours qui m’a conduit
