Page:Froissart - Méliador, tome 1.djvu/220

Le texte de cette page a été corrigé et est conforme au fac-similé.
140
Méliador

Et d’un pel en sa targe blance ;
Bonne en estoit li ordenance.
4770 Varlet avoit pour radrecier,
Le quel on nommoit Manesier,
Qui menoit .i. cheval en destre,
Et portoit la lance son mestre
Et son hÿaume a chiés de fois.
4775 Or est entrés en .i. biau bois
Graciiens, a heure de tierce.
Riens n’a sur lui ne li affierce.
Entour l’eure de miedi
Dedens ce bois il entendi
4780 La vois, qui estoit moult isnelle,
Vis li fu d’une damoiselle.
Adont a il levé la tieste ;
Si se tient tous quois et arreste
Pour lui enfourmer miex dou fait,
4785 Et de la vois, et qui la fait.
De rechief ot et bien entent, f. 36 c
A ce que l’oreille il y tent,
Que ceste n’est pas a sen aise.
A son varlet dist : « Il te plaise
4790 « A cevaucier droit ci devant
« Et va, je te pri, si avant
« Que tu me saces au retour
« De vrai conter en quel atour
« Ceste est, dont j’ai oÿ la vois.
4795 « Et se trop parfont entre ou bois,
« Mait a bouche ton cor d’ivoire ;
« Par ton son arai bien memoire
« Se je doi devers toi aler. »
Quant Manesiers oÿ parler
4800 Son signeur, si dist : « Je l’otri. »
D’iluec s’est partis sans detri
Et le bon coursier esporonne.
.I. petit vauciel environne ;