75 E se jo l’aim, jeo ferai mal :
ceo est la femme al seneschal.
Guarder li dei amur e fei,
si cum jeo vueil qu’il face a mei.
Se par nul engin le saveit,
80 bien sai que mult l’en pesereit.
Mes nepurquant pis iert asez
que jeo pur li seie afolez.
Si bele dame tant mar fust,
s’ele n’amast u dru n’eüst !
85 [Bl. 147a] Que devendreit sa curteisie,
s’ele n’amast de druërie ?
Suz ciel n’a hume, s’el l’amast,
ki durement n’en amendast.
Li seneschals se l’ot cunter,
90 ne l’en deit mie trop peser ;
suls ne la puet il pas tenir :
certes jeo vueil a li partir ! ’
Quant ceo ot dit, si suspira,
e puis se jut e si pensa.
95 Aprés parla e dist : ’De quei
sui en estrif e en esfrei ?
Uncor ne sai ne n’ai seü
s’ele fereit de mei sun dru ;
mes jeol savrai hastivement.
100 S’ele sentist ceo que jeo sent,
jeo perdreie ceste dolur.
E deus ! Tant a de ci qu’al jur !
75 si — 77 Garder — 78 cume ; uoil ; kil — 79 Si — 80 mut — 84 si ele ; ust — 86 si ele — 87 nad humme si ele — 89 seneschal — 91 sul ; peot — 92 uoil — 95 parlat — 96 effrei — 97 Vncore — 98 si ele ; dreu — 99 sauerei — 100 Si ele ; ke — 101 perdrei — 102 ad ; que al