Page:Descartes - Œuvres, éd. Adam et Tannery, VI.djvu/112

90

9-10.

Œuvres de Descartes

ordre, en ſorte que, ſi cete ſuperficie eſt toute plate, elles gardent entre elles la meſme diſtance, apres l’auoir rencontrée, qu’elles auoyent auparauant ; & ſi elle eſt courbée en dedans ou en dehors, elles s’approchent ou s’eſloignent en meſme ordre les vnes des autres, plus ou moins, a raiſon de cete courbure. Comme vous voyés icy les bales A, B, C, qui, apres auoir rencontré les ſuperficies des cors D, E, F, ſe refleſchiſſent vers G, H, I. Et ſi ces bales | rencontrent vne ſuperficie ineſgale, comme L ou M, elles ſe refleſchiſſent vers diuers coſtés, chaſcune ſelon la ſituation de l’endroit de cete ſuperficie qu’elle touche. Et elles ne changent rien que cela en la façon de leur mouuement, lors que ſon ineſgalité ne conſiſte qu’en ce que ſes parties ſont courbées diuerſement. Mais elle peut auſſy conſiſter en pluſieurs autres choſes & faire, par ce moyen, que, ſi ces bales n’ont eu auparauant qu’vn ſimple mouuement droit, elles en perdent vne partie, & en acquerent au lieu vn circulaire, qui peut auoir diverſe proportion auec ce qu’elles retienent du droit, ſelon que la ſuperficie du cors qu’elles rencontrent peut eſtre diuerſement diſpoſée. Ce que ceux