fait depuis vn gros liure, qui contient ces meſmes objections auec pluſieurs nouuelles inſtances ou repliques contre mes réponſes[1] & que la dedans il s'eſt plaint de ce que ie les auois publiées, comme ſi ie l'auois fait contre ſon gré, & qu'il ne me les euſt enuoyées que pour mon inſtruction particuliere, ie ſeray bien aiſe de m'accommoder dorénauant à ſon deſir, & que ce volume en ſoit deſchargé. C'eſt pourquoy, lors que i'ay ſceu que Monſieur C. L. R.[2] prenoit la peine de traduire les autres objections, ie l'ay prié d'obmettre celles-cy. Et afin que le Lecteur n'ait point ſujet de les regretter, i'ay à l'auertir en cet endroit que ie les ay releuës depuis peu, & que i'ay leu auſſi toutes les nouuelles inſtances du gros liure qui les contient, auec intention d'en extraire tous les points que ie iugerois auoir beſoin de réponſe, mais que ie n'en ay ſceu remarquer aucun, auquel il ne me ſemble que ceux qui entendront vn peu le ſens de mes Meditations pouront ayſement répondre ſans moy ; & pour ceux qui ne iugent des liures que par la groſſeur du volume ou par le titre, mon ambition n'eſt pas de rechercher leur approbation.
- ↑ Petri Gassendi Diſquiſitio Metaphyſica, ſeu Dubitationes et Inſtantiæ, adverſus Renati Carteſii Metaphyſicam et Reſponſa (Amſterodami, apud Iohannem Blaev, CIↃ IↃ CXLIV ; in-4, pp. 319, plus une réimpression des Meditationes de Descartes, avec une pagination à part, pp. 48).
- ↑ Abréviation de « Clerselier ».
