Qui ja aloient en decours.
Ilz garissent, de commun cours,
De plus grans maulz que fièvres quartes,
C’est grant bien que de ses amours.
N’il n’est si vieulx, soit longs ou cours,
S’il en est bien ferus acertes,
Qu’il ne lui semble tout de certes
Qu’il prendroit bien le lièvre au cours ;
C’est grant bien que de ses amours.
XIV
M’amour, mon bien, ma dame, ma princepse[1]
Tresmontaine, qui a bon port m’adrece,
Dequanque j’ay, souveraine maistresse,
Estes dame et confort de ma leesce.[2]
Je vous doy bien appeller ma deesse,
Mon doulz espoir, mon mur, ma forteresse,[3]
M’amour, mon bien, ma dame, ma princesse.[1]
Car si belle ne fut oncques Lucrece,[4]
Ne prisiée tant Pénélope en Grece,[5]
Semiramis vous passez en noblece,
Si vous doy bien dire, par grant humblece,[6]
M’amour, mon bien, ma dame, ma princesse.[1]
