L’on prendra sceance sans distinction de rang ny de condition, & ceux qui arriueront les premiers prendront les premieres places en simplicité, pour éuiter les pertes de temps & ceremonies invtilles.
L’on ne se leuera qu’à l’arriuée de Monsieur le Curé seulement.
Apres la priere, sera fait lecture & expedition du Registre.
Chacun estant appellé sur le Registre, rendra compte de la commission, auec soûmission aux ordres de la Compagnie.
Et si l’on est empesché par affaires, indispositions ou autrement, l’on rendra compte par billet ou par autruy.
L’on sera très-fidel & ponctuels à l’execution des commissions & emplois de la Compagnie, pour ne pas differer d’apporter remede au mal & procurer le bien.
L’on éuitera sur tout les interruptions, demeurant à la prudence de Monsieur le Curé, ou de celuy qui conduit la Compagnie en son absence, de les faire selon le besoin & la necessité.
Personne ne parlera qu’en son rang, s’il
