Page:D'Orbigny - Le Conte de Floire et Blanchefleur, 1288.djvu/5

Livres lisoient paienors
u ooient parler d'amors.
En çou forment se delitoient,
es engiens d'amor qu'il trovoient.
Cius lires les fist molt haster
en autre sens d'aus entramer
que de l'amor de noureture
qui lor avoit esté a cure.
[Ensamble lisent et aprendent,
a la joie d'amor entendent.
Quant il repairent de l'escole,
li uns baise l'autre et acole.
Ensamble vont, ensamble vienent,
et lor joie d'amor maintienent.
Un vergier a li peres Floire
u plantee est li mandegloire,
toutes les herbes et les flours
qui sont de diverses coulours.
Flouri i sont li arbrissel,
d'amors i cantent li oisel.
La vont li enfant deporter
cascun matin et por disner.
Quant il mangeoient et bevoient,
li oisel deseure aus cantoient.
Des oiselés oënt les cans,
çou est la vie as deus enfans.
Quant ont mangié, si s'en revont,
molt grant joie par voie font.
Et quant a l'escole venoient,
lor tables d'yvoire prenoient.
Adont lor veïssiés escrire
letres et vers d'amours en cire !
Lor graffes sont d'or et d'argent
dont il escrisent soutiument.
Letres et salus font d'amours
du cant des oisiaus et des flours.
D'autre cose n'ont il envie,
molt par ont glorieuse vie.]
En seul cinc ans et quinze dis
furent andoi si bien apris
que bien sorent parler latin
et bien escrire en parkemin,
et consillier oiant la gent
en latin, que nus nes entent.
Li rois aperçoit bien l'amour
que ses fius a a Blanceflour.
Forment cremoit en son corage
que, quant ses fius ert en eage
que feme devra espouser,
que ne s'en puisse deporter.
Es cambres vint a la roïne
consel prendre de la mescine.
S'ele li done a son talent,
ocirra le hastivement,
puis querra selonc son lignage
a son fil feme de parage.
La roïne voit son signor
iriet, bien part a sa coulor,
car de sanc ot le vis vermel.
Il l'apele par grant consel :
"Dame, fait il, malement vait
de vostre fil, mal li estait.