Cette page a été validée par deux contributeurs.
CHANSON
SUR LA VIE DE MÉNESTREL
Sire cuens, j’ai vielé
Devant vous, en vostre osté ;
Si ne m’avez riens doné
Ne mes gages aquité,
C’est vilanie ;
Foi que doi sainte Marie !
Ainc ne vos sievrai je mie.
M’aumosniere est mal garnie
Et ma malle mal farsie.
Sire cuens, quar comandez
De moi vostre volonté.
Sire, s’il vous vient à gré.
Un beau don car me donez
Par cortoisie.
Talent ai, n’en dotez mie,
De r’aler à ma mesnie.
Quant vois borse desgarnie,
Ma feme ne me rit mie.
Ains me dit : sire Engelé,
En quel terre avez esté,
Qui n’avez rien conquesté
Aval la ville ?
Vez com vostre male plie,
Ele est bien de vent farsie.
Honi soit qui a envie
D’estre en vostre compaignie !
