je seray obligé d’en tirer satisfaction, et d’en donner advis à Sa Majesté.
Sur ce je suis. Messieurs, votre bien humble serviteur.
DE CAUMONTS.
La Cour répond le 28 au maréchal de la Force que les coupables dont il se plaint seront châtiés. « Et non-seulement en les choses icy, ajoute-t-elle, ainsy en toutes aultres, vous cognoistrez nos saines intentions pour la bonne observance de la neutralité. Et ne croyons pas aussy que celle du roy très chrestien ny la vostre soit de la rompre, pour les querelles particulières arrivées de la sorte sans desseing ny soubçon quelconque qui puisse accuser personne de ce pays y avoir participé. C’est pourquoy, Monsieur, nous vous prions et requérons très instamment d’empescher l’effect des menasses du sieur de Gassion, en lui représentant le respect qui doibt estre gardé touchant la généralité des provinces neutralisées. »
Dole, 29 février 1636.- La Cour au gouverneur de Jonvelle, au sujet des plaintes du maréchal de la Force.
Monsieur d’Aboncour, en mesme temps que nous despeschions vostre messagier, est arrivé le porteur qui nous a délivré les responses des sieurs de la Force et de Gassion ; ensemble de la vostre à eulx, joincte à la lectre que nous escrivez à mesme fin. Et sommes estonnés que ne nous ayez rien dict par la précédente de la querelle du sieur de Mitry avec les particuliers, puisqu’elle estoit survenue trois jours auparavant le départ de vostre messagier, et que l’affaire estoit de la conséquence que vous voyez. Au subject de quoy nous escrivons la cy-joincte audit sieur de la Force, laquelle vous lui envoyerez apprès l’avoir veue et fermée, pour ce qu’elle est à cachet volant, afin de vous informer de la teneur. Que si vous et ceulx de Jonvelle eussiez conclu à nostre dernier ordre de n’y laisser aucunes gens de guerre qui puissent donner de l’umbrage, nous ne serions pas en ces paines. C’est un bien qu’ayez faict arester et garder ceulx qui ont blessé le sieur de Mitry, afin de les chastier ; et ne manquerez d’en faire faire
