Page:Chrétien de Troyes - Roman de Perceval le Gallois - MS 248.pdf/83

Et lor gent afoléé et morte
Si sen vienent droit vers la porte
Tot desiréé et desrengie
Et cil se tindrent tuit rengie
A la porte serrement
Si recourent hardement
Mais poi de gent et faible furent
Et li altre de force crurent
Des serianz qui seuz les orent
Tant que cil soffrir ne les porent
Et en lor chastel se retraient
Et li altre durement traient
En la grant fole et an la presse
Qui moult ert ardanz et engresse
Sentrent el chastel abandon
Tant cune flote de randon
Sest de denz o els enbatue
Et cil de sus ont ？ abatue
Une porte sor cels de soz
Qui ocist et esquaiche toz
Cels quele ateint a son cheoir
Onques mes rien nule ne pot veoir
Clamadeus dont tant fust dolant
Que moult a la porte colanz
De sa gent morte. et lui fors clos
Sestuet quil se retiegne a pos
Que li assauz en si grant haste
Ne seroit fors que paine gaste
Et ses mestres qui le conseille
Li dist sire. nest pas merveille