Page:Chrétien de Troyes - Roman de Perceval le Gallois - MS 248.pdf/75

De lor lances voler andeus
A guigarons chai toz seus
Qui fu parmi lescu navrez
Si que li braz et li costez
Le senti dolerosement
Et li vaslez apie descent
Qui nel set a cheval requerre
Del cheval est venuz a terre
Et trest lespéé si lui passe
Na sai que plus vos devisasse
Coment il avint a chascun
Ne toz les ？ par un et un
Mais la bataille dura molt
Et moult furent lu cop estolt
Tant que guigarons chai
Et cil fierement lenuai
Tant que cil merci li cria
Et cil dit que il navra
De lui merci. ne tant ne quant
Si lui sovint il ne porquant
Del prodome qui lui aprist
Qua son escient noceist
Cheval. des que il leust
Conquis et al desore enfust
Et cil li dist biax amis dolz
Or ne soiez pas s estolz
Que tu naies merci de moi
Et ge te creant et otroi
Que bien en est li pooirs tuens
Et cheval. ies tu moult buens