Quant l’ermite l’entent, petit l’en a grevé.
Pour l’amour des barons qui si sont agrevé.
« Baron, dist li hermitez qui fu viex et kenus,
Moult par deves amer le gloricus Ihesus ;
Or ne vous esmaiez, bien serez secourus.
Assez aves vitaille, ne vous dementez plus
De chele, comme Dix me consaut de lassus.
Si avez vin assez, ne soiez esperdus,
Et blanc pain buleté, maiz or faites le fu.
Si vous coffez [à] aise, bien sarez vous venu. »
Renaus li fiex Aimon n’i est arresteüs,
Tost et isnelement a alumé le fu,
Et si frere ensement ne sont mie trop mu.
Puis ont mise le table et le blanc pain [enson].
Et blanc vin et chervoise et poisson à foison.
La viande fu preste sans nule arrestison.
Maintenant sont assis li chevalier baron,
Aveuc aus ont assis le traïtour Yon.
Il avoient viande plenté et à foison.
Seigneur, or sont [à] aise li .iiii. fil Aimon.
L’ermite donne avoine à Baiart l’arragon.
Or mengüent ensanle li chevalier baron.
Quant il orent mengié, Jhesu gracient mont.
Li baron se leverent quant il orent mengié,
Renaus, li fiex Aimon, l’ermite a merchié
Du pain, de la vitaille, dont les a soulagiez.
Durement sont [à] aise li chevalier proisié.
Quant nuit fu venue, li baron sont couchié.
A son pooir les a li hermitez aiesiés.
Li troi frere dormirent, et Renaus a veillié.
De sez freres se doute, si en a grant pité.
Et quant virent le jour l’endemain esclairié,
Li hermitez lor a le diner pourcachié.
Assez lor en donna, car il en ot pitié.
Et quant il ont diné, ne s’i sont atargié.
D’iluec s’en sont parti haut et joiant et lié.
La ducoise ont levée sor Baiart le coursier,
Et les deus enfanchons qui firent à proisier,
L’ermitez lor donna .i. palefroi coursier.
Renaus, li fiex Aimon, l’ermite a gracié ;
A Diu le commanda, le pere droiturier.
L’ermite les commande à la vertu du chiel.
De la pité qu’il a, commenche à larmoier.
Page:Castets - La Chanson des quatre fils Aymon, 1909.djvu/993
Le texte de cette page a été corrigé et est conforme au fac-similé.
965
appendice
