Mere Diu Jhesus Cris, vierge boine eürée,
Secourez vos barons, Dame, s’il vous agrée.
Las ! Ja sui jou Renaus à la fiere pensée
Qui si tres grant biauté avoit et [esmerée],
Qui avoit douche dame de s’amour embrasée,
Et soloit si ferir de la tranchant espée ;
Qui si grant terre avoit et riche et asasée,
Qui tant fu redoutez en Franche la loée !
De ma rikesse estoit si grans la renommée,
Poi parloit on d’autrui en ichele contrée.
Et or m’est povretés si tres grant sormontée
Que jou ne puis avoir de pain une denrée.
Faus est qui pour rikesche alieve le posnée,
Car moult par lui est tost hors de la main coulée.
Las ! je vich ja del jour, ch’est vérités prouvée,
Ne daignoie mengier fouache buletée,
S’es pessiaus ne fust broïe et demenée.
Char de porc me tuoit le fresche et le sallée,
La char de buef ne fust de mes yex regardée,
Et or m’est bien avis, ch’est verités prouvée.
Que se un peu avoie beü de la fumée,
Que ber nasqui de mere en icheste jornée.
Seignor frere, dist il, quelle i aves pensée ?
Se nous morons de fain, chou est lastez prouvée.
Ochions nos chevaus sans nule demourée.
Je mengerai Baiart à la crupe triulée
[Qu’es Espaus] me douna [Oriande] la fée.
Moult vaut miex que Paris, chelle chité loée,
Mar fu si riche chars quant n’i aura povrée.
De basme et d’or molu deüst estre pevrée. »
Lors a mise sa main à la trenchant espée,
Venus est à Baiart à la se[l]ve ramée.
Baiars voit son seignor, s’a la teste enclinée,
A genoullous se met comme beste senée ;
Aussi com pour cauper li a il delivrée,
Car la parole avoit oïe et escoutée :
De Renaut connoissoit le cuer et le pensée,
Le vis qu’il ot troublé et la coulour muée
Et voit comme la corde li est au col fremée,
Ne quoi fuïr ne pot ne faire destournée.
Parmi les iex li est la clere yaue allée
Si que l’erbe et la fueille en est toute arousée.
Page:Castets - La Chanson des quatre fils Aymon, 1909.djvu/955
Le texte de cette page a été corrigé et est conforme au fac-similé.
927
appendice