Tant tindrent lor jornées, et ce nos fait à croire,
Qu’il vindrent à Tremoigne là ò en est l’estoire.
Si vous di bien por voir, n’an alez ja doutant,
Il i a .i. martir que Diex par aime tant
Que trestuit les malades i garissent briement.
Je i sui toz gariz, si me soit Diex aidanz.
Signors, mais or me ditez que vous alez querant ;
Mont volantiers l’orrai, si me soet Dieux aidans. »
« Par foi, ce dit Richars, .i. homme peneant
Qui estoit notre frerez et notre bien voillanz :
Mais n’an poonz oïr novellez ne semblant.
Longuement l’avons quis, s’an sommez mont dolant. »
« Signor, dit li prodons, par Dieu le roi amant,
Je croi que ce est cil que vous alez querant,
Car merveille resemble ce damoisel vaillant
Au vis et à la boche et à tout le semblant. »
Quant li frere l’oïrent, s’en furent mont dolent,
Et ont prins le congié du pelerin errant.
Entresi qu’à Coogne n’ont pris arrestement.
Les le mostier decendent où out du pople tant
Que ne saurent à dire prestre ne clerc lisant.
Les le mostier decendent li chevalier loé
Erraument i entrerent, n’ont esperon osté
Jusqu’au caret en vindrent où virent la clarté.
Le cors ont conneü et mont bien avisé.
Quant il ont cen veü, si sont chiet pasmé.
Et li bon archevesque a le clergie chené.
« Segnors, dist l’archevesque, bien nous est encontré.
Encui auron nouvelez qu’avon tant desiré. »
Et li baron se sunt de pasmeson levé,
A une vois s’escrient li chevalier loé :
« Que porron devenir, chetif, maleüré,
Quant est mort nostre frere por qu’estion doté ?
Elas ! qui a ce fait, si fiere cruauté ?
Fr[er]e, qui si vous a [o]cis et lapidé,
Il ne connoisse[t] mie vostre r[u]iste fi[e]rté
Ne vostre vasselage ne vostre grant bonté.
E ! frere, or summes nos en mal broion entré,
Que james ne seron cremus ne redouté
Quant nous l’avon perdu et Maugis le faé
Qui prist le caperon et se rendi à Dé.
Mors est bien le [aa]von, en le nous a conté.
