Page:Castets - La Chanson des quatre fils Aymon, 1909.djvu/925

Le texte de cette page a été corrigé et est conforme au fac-similé.
897
les quatre fils aymon

Li autre vont apres qui orent bon mimoire.
Et ge, por amor Deu, baron, que conteroie ?

    45Qu’an tel lieu nous anvoit par son commendement
    Dont nous oions novellez de Regnaut le vaillant. »
    Dont respondi chascun « Endroit moi le creant. »
    Dont se laissent ainssis jusque à l’ajornant.
    Au matin parson l’aube, quant il fu esclariez,
    50Se sont li fiz Aymon mont bien apparilliez,
    A lor franche moiller ont demandé congié.
    De Montauban issirent le bon chastel prisié,
    A Damedieu de gloire ce sont tuit otroiez.
    Qu’i[l] lor soit en aïde par la soie pitié.
    55Or chevauchent li frere qui sont gentiz et ber.
    Lors neveus sont o eus qui mont font à loer.
    Trestoutez lor jorneez ne vous sai aconter,
    Mais tant ont chevauchié, esploitié et erré
    Que à Coloigne vinrent .i. soir à le vespré.
    60Celle nuit i sejornent li vaillant bacheler ;
    Landemain par matin resont acheminez
    Trestout à l’aventure, ne scevent où aler.
    Or chevauchent li contez trestout à l’aventure,
    De la queste qu’il font ne truevent nulle cure,
    65Dolanz et abomez chevauchent l’ambleüre.
    « Signors, ce dit Aymons, par la digne figure,
    Se ceste notre queste auques longuement dure
    Vendre nous convanra les no chevaucheüre
    Par besoigne d’argent et por notre poture. »
    70Quant Richars l’a oï, si dit à chiere obscure :
    « Quant tot iert despandu notre chevaucheüre,
    Bien sarai demander pain et autre poture ;
    Mais, se Dieu plest le roi qui tote rien mesure,
    Il nous convoiera de notre questeüre ».
    75Ainssin com il parloient, e vous par aventure.
    A l’antrée du boiz, en une voie oscure,
    Ancontrent .i. prodomme chevauchant .i. mule,
    Et quant Richars le voit, si li dit par droiture :
    « Dont venez vous, prodonz, par la votre aventure ? »
    80« Sire, jou vous dirai, se Damediex m’aiüe :
    Je me vaing de Ceoigne à ma bonne aventure. »
    « Signors, dit li prodonz, or oez mon samblant.
    Je me vaing de Ceoigne qui est et large et grans.