Mort sont li champion à duel et à belloi.
Certes ges secorrusse, mais si armés les voi,
Ja me corroient sus par loœment lo roi. »[1]
« Sire, ce dist Hardrés, par Dex, ce poise moi,
Mais plus n’en poons faire, par la foi que vos doi.
Or refraignies vostre [ire], et cascuns endroit soi ;[2]
Si faisons bel samblant, et laissomes l’annoi,[3]
Encor venra .i. jors, issi comme ge croi,
Que vangier lo porrons belement sans foloi, »
« Ha ! Dex, dist Guenelons, autre chose n’i voi.
Lo vangier desir molt, s’an sui en grant effroi. »
Irié sont li traïstres, si ne sevent que faire,
Et cil sont en l’estor por l’un l’autre defaire.
Aymons gita d’aïr, de [Costant] vait retraire.[4]
Les las li a tranchiés, qui qu’en doie desplaire,
Et des dens ne sai qantes abati en l’aumaire.
Costans est cheüs jus, à mort lo covint traire :[5]
« [Ahi ! Rohars, biau frere, lairas m’i tu desfaire ?] »[6]
Et Rohars s’escria, quant il l’oï si braire :[7]
« Hé ! [Costans], bialx dolx frere, ge ne puis vos sustraire,[8]
Et [diables] me [tient] ò ge ai trop à faire.[9]
Par tans m’aura conquis, Dex li otroit mal faire. »
Quant Yvon voit Costant, Aymons l’a si laidi,
Por po ne l’a ocis, maintes dens li toli,
Yvon en pensa molt, [s’an ot le cuer] marri.[10]
Miels l’amast à ocire que l’anor de Ponti.
« Par Diex, dist il, biax frere, or m’as tu mal bailli.
Ge lo cuidai ocirre et tu l’as asailli.
- ↑ 17633 A par le comment du roi.
- ↑ 17636 L vostre et. A vostre ire.
- ↑ 17637 A que il n’i ait desroi.
- ↑ 17644 A Aymez... Costant. L Rohart. A hurta d’aïr.
- ↑ 17647 L à mort lo covint traire. J’ai pris l’hémistiche de A, malgré la répétition de braire plus bas.
- ↑ 17648 Pris de A. L manque ; nécessaire, vu les v. suivants.
- ↑ 17649 A Costans. L Rohars.
- ↑ 17650 L Rohars. Mais c’est lui qui parle. A Et Rohars li a dit.
- ↑ 17651 L deable me tienent. Je mets le singulier en raison du vers suivant.
- ↑ 17655 Sic A. L si an furent marri.
