Au chaple sont li .iiii., irié comme lion,
Yvons coita Costant, Rohars coita Aymon.
Par aïr se requerent comme bon compaignon,
Pres furent esloignié do giet à .i. bouzon.
Donc i ot .ii. batailles, ains millor ne vit on,
Haymes coita Rohart de cotte et de cançon :[2]
Ce furent li dui menre, de voir lo vos dison.[3]
Li [ainné] se tornerent par itele raisson,[4]
L’un ne forfait à l’autre la monte d’un baston.
[Se l’un fiert, l’autre rant, tex est la contançon].[5]
« Par Dex, dist Charlemaignes, grant merveille veon.
Si sont cil dui paroil, toz nos an merveillon. »
« [Sire, ce dit Rollans, sauve votre raison],
Costans n’a pas l’oreille, vez la sur le sablon ».
« Non a il, dist Ogiers, del nes et del menton. »[6]
« Voirs est, dist l’empereres, par mon flori grenon.
De mal jor l’apela, ge cuit, de traïson :
Il lo comparra chier, qui qu’en [poist] ne qui non. »
« Par Dex, dist Richardes, tot oiant Guenelon.
Ancui lui cuit fermer el col .i. cha[a]ignon. »[7]
La bataille fu fors, fiere et dure et pessanz.
Aymons retint Rohart, si [le] va laidengiant,[8]
Sovant lo fiert do poing, souvant lo fiert do brant.
Il ont tant chaploi[é] sor lo prei verdoiant[9]
Que il furent à pié, com champion vaillant.
Lor chevax d’autre part se revont combattant.
Li uns gita à l’autre, molt lor va laidement,[10]
« Par Dex, dist Charlemaignes, mervelle voi molt grant
Or avons .ii. batailles, bien est aparissant.[11]
- ↑ 17480 A Yon. L Aymons.
- ↑ 17486 A Yonz hata Constant.
- ↑ 17487 A Ce sont li .ii. ainnez.
- ↑ 17488 L anné.
- ↑ 17490, 17493 Vers pris de A. L manque.
- ↑ 17495 A don nez le sommeron.
- ↑ 17500 L chaignon.
- ↑ 17502 A mont le va destraignant. L. si li va laidement.
- ↑ 17504 L chaploï. A chaploiet.
- ↑ 17507 A et se mordent forment.
- ↑ 17509 Il semble en effet que le tournoi (Cf. 17005-17019) ait pris fin ; mais Constant va venir au secours de son frère, puis ce seront deux duels.