Lors sont li fel rangié, cascuns d’ax s’i avance ;[1]
Agenoillié se sont, voiant la gent de France.
A genols sont li lerre, iluec ò li saint erent ;
Oiant tote la gent en bruï s’escrierent,
Issi lor aïst Dex et li saint qui là erent,
Renaus ocist lor pere que il tant par amerent,
Par fine traïsson, et si frere l’aerent.
Puis ont baissié les sains, .ii. bessant i mierent.
Atant sont relevé et ariere tornerent.
Ensinc, com font lor tor, ammedui chancelerent,
Voiant tote la cort, andui s’antrehurterent.
Molt en failli petit à terre ne volerent,
Mais li uns sostint l’autre, amont se releverent.
Rollans dist à ses pers qui tot ce esgarderent :
« Molt a ci povre [pleige], ge cuit mar en parlerent. »[2]
Yvon en vint à sains, o lui ses frere Aymon,[3]
Ammedui avalerent à coste à genoillons,
Puis se sont escrié, oiant tos les barons,
Issi lor aït Dex et li saintimes nons,
Menti ont li fil Forque de ceste traïson,
Si lo li [mosterront] ains lo soleil rescons.[4]
Atant baissent les sains, mis i ont .ii. mengons,
Et puis se sont levé, si droit comme lions.
Lor chevax demanderent, si saillent es arçons
Et Charles les seigna et Torpins et Naymons.
Li .iiii. sont monté es bons corrans destriers,
Lor .iiii. lances prenent, par samblant furent fiers.
Primes parla Costans qui fu fel pautoniers.
« Rohart, dist il, biax frere, ne soes pas leniers.
Quant ge serai devant et tu voies derier,
Car loaument te di, comme mes amis chiers,
Nos n’aurons nule aïde, trop a ci chevaliers. »
« Non voir, ce dit Rohars, or sus les losangiers. »
Li fil Forcon s’eslaissent contremont les herbages,
